عالم العمل الحر بدأ يتوسع بشكل كبير جداً خاصة فى 2020 ناس كتير بدأت تدخل فى المجال بمهن كتير جداً، والوعي بدأ يزيد بالمجال وبجميع المهن والخدمات اللي بتتقدم جواه، وعشان كدا دي قائمة الوظائف الأكثر دخلاً السنة دي بناءً على إحصائيات مواقع عالمية، يلا بينا:
1.البرمجة.
هفضل أقول البرمجة هي المستقبل من هنا لحد آخر السنة، المبرمجين مطلوبين في العالم كله، والربح من البرمجة كبير جداً، البرمجة مجالاتها واسعة بداية من تطوير برامج سطح المكتب، وبرامج تحليل البيانات، وتطوير الألعاب والتطبيقات..إلخ.
2.تطوير الويب.
كل لما العالم بيطور الشركات والأفراد في حاجة للتواجد على الانترنت ودا بيخليهم محتاجين مطورين الويب عشان يساعدوهم في بناء المواقع والمتاجر الإلكترونية، وتطوير اضافات وقوالب الووردبريس، وتصميم صفحات الهبوط، وطبعاً الانترنت مليان دروس وكورسات وكتب عن المجال دا.
3.تطوير التطبيقات.
كل الشركات وأصحاب الخدمات والمنتجات عايزين ياخدوا مكان في عالم الثروة الذكية من خلال تطبيقات الهواتف الذكية، فكل شركة دلوقتي ليها تطبيق على الاندرويد والايفون، ودا بيخلي مطورين التطبيقات ليهم مكانة مميزة في عالم العمل الحر.
4.التصميم.
عمرك اشتريت حاجة وملقتش عليها تصميم بيعبر عنها، سواء منتج أو كتاب أو حتى إعلان ! طبعاً لا عشان كدا المصمين مهمين في العالم الواقعي وعالم العمل الحر، والأدوات اللي بيستخدمها المصممين كتير جداً وسهل تعلمها على اليوتيوب.
5.التسويق الالكتروني.
منتجات وخدمات ومشاريع تتواجد كل يوم ومن الضروري أنها هتحتاج لحد متخصص يعرف الجمهور عليها ويفهمهم بطريقة معينة أنهم محتاجنها لسد احتياجاتهم الحياتية، المتخصص دا هو المسوق والطريقة اللي هيشرح بيها المنتجات للجمهور هي التسويق الإلكترونى، وكل ما زادت المنتجات كل ما مهنة التسويق الالكتروني زادت اهمية وربح لصاحبها.
6.الكتابة والترجمة.
مفيش مجال من مجالات العمل الحر مش بيحتاج للكتابة والترجمة، سواء الكتابة والتعمق باللغة الأم أو استخدام الترجمة لفهم التطور اللي بيحصل في العلوم الأخرى حول العالم، وطبعاً دا خلى الكتابة والترجمة تاخد الترتيب السادس في قائمة الوظائف الأكثر دخلاً السنة دي.
7.المحاسبة والاستشارات المالية.
المحاسبة والاستشارات المالية من الوظائف الجديدة اللي ظهرت مؤخراً، وفى نفس الوقت خدت حيز كبير لاهميتها في الشركات الكبيرة أو الناشئة، ومع زيادة نسبة العاملين من البيت الفترة دي في جميع دول العالم هتزيد نسبة الحاجة للمحاسبين والمستشارين الماليين اللي ممكن يشتغلوا من البيت كل اللي هتبقى محتاجه للوظيفة دي شهادة المحاسب العام (CPA)، وشهادة المُخطِّط المالي (CFP)، وشهادة إدارة المخاطر المالية (FRM).
8.الاستشارات القانونية.
الاستثمار والتجارة بقت عابرة للقارات ومش كل أصحاب الشركات ورجال الأعمال فاهمين قانون سواء المحلى أو الدولى بالتالي بقي فى حاجة ملحة لوجود مستشارين قانونين يشتغلوا عن بعض لتقديم استشارات قانونية وكتابة عقود بشكل مستقل.
749 مشاهدة
