أكثر من طالب سألني قبل ما يحجز معايا الكورس بجانب أسئلة كتير على الدايركت بتقول هل فعلا كتابة المحتوى مهنة سهلة ؟
بشكل عام مفيش شغلانة سهلة لا أون لاين ولا حتى أوفلاين، لإن ببساطة عشان الإنسان ينجح في مجال معين هو محتاج يتعب الأول عشان يقدر يحقق النجاح دا، بس خليني أتكلم بشكل محدد أكتر عن كتابة المحتوى من خلال تجربتي.
كتابة المحتوى كمهنة ممتعة جداً بس بشرط تكون بتحبها ومقتنع بيها، لان في فترات هتيجي هتبقي مضغوط جداً فى الشغل من جوانب كتير حتى لو شغال فريلانسر ( بالقطعة يعني ) طيب عشان توصل لسهولة المهنة أو أنها تبقي مريحة رغم التعب محتاج تعمل ايه ؟
✳️التعلم، لازم تحط في دماغك إن التعلم شئ أساسي ومستمر في كتابة المحتوى، مش بس تتعلم الكتابة وقواعدها وأصولها لأ كمان هتتعلم حاجات ومهارات تانية تخدم الكتابة زي انك تتعلم تستخدم الوورد أو الأكسيل.
✳️التخصص، على الرغم من وجود كتّاب محتوى كتير بيكتبوا في كل المجالات وأنا كنت منهم لفترة قريبة، لكن اكتشفت ان التخصص في مجال بعينه شئ مهم جداً بيديك الخبرة والمكانة المميزة في المجال زي أنك تتخصص في مجال السياحة أو الرياضة أو التقنية، شرط تكون بتحب المجال عشان تقدر تتطلع على كل ما هو جديد فيه كورسات أو كتب أو برامج.
✳️الاستمرار، الاستمرار في الكتابة هو اللي هيخليك تكتب بسلاسة، سيب الكتابة كدا 3 أو 4 أيام وأرجع تاني جرب تكتب زي الأول هتلاقي تأثير سلبي جداً على قدرتك على الكتابة.
✳️البحث، قدرتك على البحث عن معلومة معينة والوصول لصحتها دا شئ مهم جداً في المجال و مع الوقت هتكتسب مهارة أنك تعرف توصل للمعلومة في وقت أقل من الأول شغلك هيبقى أسهل.
✳️الإبداع، هفضل عند كلمتي مهما كتر كتّاب المحتوى في المجال اللي عنده حس إبداعي في كتابته هو اللي مكمل مهما حصل.
11 مشاهدة
