ما هي الوظائف التي يمكنني أن أعمل بها وأنا على مقاعد الدراسة؟

وأنت قاعد ماسك الموبيل بتقلب في السوشيل ميديا على الفاضي فى 52000 طالب في بريطانيا بس بيديروا مشاريعهم الخاصة على الانترنت جانب الدراسة، لو نفسك تبقي واحد منهم فالبوست دا عبارة عن ٩ وظائف تقدر تشتغلها وأنت طالب:

١. مودريتور.
بما أنكم بتقضوا معظم وقتكم على السوشيل ميديا زي الفيسبوك والإنستجرام ممكن تستغلوا دا وتشتغلوا مسؤولين عن حسابات السوشيل ميديا لبعض الشركات اللي مسؤوليتكم فيها بتكون الرد على استفسارات العملاء في التعليقات والرسائل، وهتلاقوا الوظائف دي على جروب أسمه سوشيل ميدياوي على الفيسبوك.

٢. كاتب محتوى.
كل لما زاد عدد الشركات كل ما زاد عدد المواقع للشركات دي وبالتالي أصبح فى حاجة لكتّاب محتوى يكتبوا مقالات واعلانات ومنشورات سوشيل ميديا، وبما انك طالب ممكن تشغل بالقطعة والحساب يبقى بعدد القطع اللي كتبتها.

٣. مدقق لغوي.
لو انت شاطر في النحو والصرف ممكن تشتغل مدقق لغوي سواء باللغة العربية أو الأجنبية، وتصحح الأخطاء اللي فى المحتوى بتاع المواقع اللي بتطلب كتاب محتوى، وطبعاً الشغلانة دي منتشرة على مواقع العمل الحر سواء العربية أو الأجنبية.

٤. مُبرمج.
لو أنت بتدرس فى كلية من كليات الحاسبات والمعلومات فأنت عندك فرصة عظيمة تشتغل مُبرمج باللغة البرمجة المناسبة ليك، وممكن تدخل على موقع أكاديمية حسوب هتلاقي دورات لتعلم البرمجة من الصفر.

٥. مصور.
ناس كتير بتحب التصوير بس ناقصها مهارات كتير عشان تقدر تبيع صورها على مواقع زي Shutter stock، أو تشتغل مصور منتجات، وعشان تتعلم المهارات دي ممكن تدخل على اليوتيوب، لكن لو عايز تتعلم من حد محترف ويديك نصائح ويدعمك أثناء التعلم مفيش أحسن من كورس التصوير بتاع فدوى سليمان @fadwasoliman ❤️

٦. مصمم جرافيك.
اي حد عنده نشاط تجاري بيحتاج مصمم جرافيك ودي شغلانة سهل تتعلمها عن طريق تعلم الفوتوشوب والاليستريتور، ولو أنت طالب في كلية فنون تطبيقية أو فنون جميلة هيبقي لازم تشتغل مصمم على طول.

٧. مدرس خصوصي.
لو أنت بارع في الشرح وتبسيط المعلومة ممكن تشتغل في مجال التدريس سواء شرح مواد دراسية زي العلوم أو الرياضيات أو اللغات زي الإنجليزي، وهتلاقوا كورسات على موقع إدراك تعلمكم التدريس على الانترنت.

٨. مساعد باحث.
كتابة الأبحاث ورسائل الماجستير والدكتوراه مرهقة وبتاخد وقت كبير، وفى ناس بتطلب المساعدة من الآخرين بمقابل مادي، لو عندك القدرة انك تحصل على مصادر علمية موثوقة من مكتبة الجامعة بتاعتك يبقى يلا ابدأ على مواقع العمل الحر فوراً.

9. مدخل بيانات.
من أسهل الوظائف بالنسبة للطلبة كل اللي محتاجه فيها أنك تكون سريع في الكتابة على الكيبورد وأنك تكون قادر تستخدم برامج الوورد والأكسيل، وطبعاً هتلاقوا شرح كتير ليهم على اليوتيوب.