ما هي اكثر آيه قرآنيه اثرت بك؟

اعوذ بالله من الشيطان الرجيم
قال تعالى (ومن اياته ان خلق لكم من انفسكم ازوجا لتسكنوا اليها وجعل بينكم مودة ورحمة ان في ذلك لايات لقوم يتفكرون ) صدق الله العظيم

القصة طويلة جدا لو قعد أكتب فيها هخسر الجايزة ههههه بس نقولها لله والله يغنينا
وهحكيها بالعامية لسهولة الوصول
انا مكنتش ملتزم  ومهتم بنفسي وبس ومليش علاقة باللي حوليا يعنى بعاملم حلو اه بس مبسعاش اني افرحهم المهم انا افرح
أمي تعبت وانا كنت بحبها جدا لكن بردة مشغول بنفسي عنها ومكنتش بصلي بس صلاة الجمعة وخلاص
بأخر أيام أمي قبل وفاتها باسبوع كان عندها جلسة علاج كيماوي كانت مريضة سرطان رحمها الله وكنت  انا عندي 19 سنة وهقعد مع  اصحابي نلعب
طلبت مني اني اروح معاها المستشفي فكان رايح معاها ابن خالتي قولتها هوا ابن خاتلي جاي معاكي فانا مليش لازمة بقي اجي سكتت
ونزلت هيا للجلسة وانا نزلت لأصحابي
أنا بكتب وانا بعيط والله ربنا يسامحني
المهم رجعت وانا معرفش اصلا يعني ايه كيماوي أتاري ياحبيبتي آلم ميتحملهوش جبل نزل اسندها قالتلي بقي يا ابراهيم اطلب منك تيجي معايا وتونسني ومتجيش وزعلت فزعلت انا جدا واتاسفت وقولتها معرفش والله بس كنت تعبان
بعدها باسبوعين دخلت امي بغيبوبة  واتصلوا بيا تعال ماما تعبانه شوية روحت مكنتش بتتحرك قعدت جنبها اربع ايام شريط حياتي بيمر قدامي ولا قادر اعمل حاجة
وكلمتها بقي يابراهيم بقي احتاجك جنبي تونسني ومتجيش كربااااااااج عمال يجلدني
ماتت أمي :(
رحمها الله قدامي
انسحب من المشهد منهار واتوضأت ودخلت غرفة قفلت علي نفسي وبصلي وانا منهار انا مش فاكر من قد ايه مصلتش كدا
وقعدت ادعي بعد ساعة بابا اكتشف اني مختفي قعد يدور عليا ملاقنيش بيفتح الاوضة دي لقاني ساجد
يالله
هوا كان نفسة يشوفي ملتزم
وسط عياطة علي امي سمعته بيقول ربنا يهديك يابني  الحمد لله
مش قادر اكمل والله
قعدت ساعتين اصلي وادعي لحد ما اذن الفجر دخلت المسجد راسي مكسورة وقلبي مكسور ونفسيتي زفت

موطي راسي  وبرفعها ادعي لقيت الآية دي
بسم الله الرحمن الرحيم
 (( واتقوا يوما ترجعون فيه الي الله ثم توفي كل نفس ما كسبت وهم لا يظلمون ))

كانت زلزال قوي جدا هزتني

من بعدها الحمد لله حياتي اتغيرك مليار بالمية بقت حياتي للناس وللي حوليا ونسيت نفسي 

بس أمي راحت 

أدعولها بالله عليكم :( وادعولي ربنا يخفف وجعي