كيف يمكنني أن أعمل مشروع سوبرماركت ناجح أو أي مشروع ويتوفر لدي كراج؟

في البداية كونك عارف المكان ومحدد المنطقة بيسهل عليك تطبق خطوات عمل المشروع لأنك بتعرف المنطقة وسكان المنطقة اللي حولين الكراج..
قبل ما تقرر المشروع اعمل مسح على المكان من ناحية شو الحاجات اللي بتنقص المنطقة مثلاً في صيدليات كتير او لا.. سوبرماركت .. مخيطة.. مكتبة.. مخبز.. مطعم.. مغسلة.. الخ؟
وكمان ادرس طبيعة العملاء المحتملين لمشروعك؛ شو الحاجات اللي بتهمهم ؟ واذا بهتموا بالنوعية وللا بالسعر ؟ مشان تعرف طبيعة الخدمة اللي تقدمها هل تركز عالسعر يكون رخيص مثلاً وللا تركز عالجودة تكون عالية حتى لو السعر غالي؟ تقدم خدمة التوصيل وللا السكان ما بيفضلو يدفعو بدل رسوم توصيل؟
وفي نقطة مهمة ما هي المهارات التي تجيدها ؛ يعني مثلاً تجيد مهارات البيع وبنفس الوقت عندك مهارات عمل البحوث أو مهارات الترجمة ممكن تعمل مكتبة بتقدم خدمة كتابة البحوث والتقارير أو خدمة الترجمة.. او اذا في فكرة مناسبة للمنطقة وبحاجة لمهارة معينة مو موجودة عندك لنفرض مثلاً محل ميكانيك سيارات ممكن تشارك شخص يملك هاي المهارة او تشغله معك اذا بتملك رأس المال الكافي لراتبه..

أتوقع بعد اجابتك لهاي الأسئلة رح يكون عندك تصور لطبيعة المشروع اللي بدك تفتحه.. وهون بتبدا تحسب تكاليف التأسيس والتشغيل بما في ذلك اجراءات ومتطلبات الترخيص والضرائب واي تفصيل صغير ممكن تدفعه كتكلفة .. وبتقدّر طريقة وهامش الربح ..
بالمجمل بتعمل دراسة جدوى للمشروع بتقدر من خلالها تتنبئ بمستقبل المشروع اذا رح ينجح وللا لأ، وشو ممكن تعمل من سيناريوهات حتى تتجاوز نقاط ضعف المشروع ويصير مربح إن امكن، وبتوضحلك كم التكلفة المالية لتأسيس وتشغيل المشروع..

وبعدما تقرر انك تكمل بالمشروع بنفس الفكرة أو بتدرس فكرة تانية .. بتبدا تدور على تمويل سواءً من مالك الشخصي او من الاهل والمعارف أو قروض أو شركاء الك أو غيرها من وسائل متاحة الك... وبتكتب خطة عمل المشروع تبدا بالتراخيص مثلاً وتحقق متطلبات حصولك على الرخصة وبنفس الوقت تبدا تجهز قائمة بالمزودين المحتملين اللي رح تتعامل معهم وتجهيز فريق العمل وغيرها من خطوات ...

واخيراً بتعمل خطة لتسويق المشروع والاعلان عنه واطلاقه ...  يعني ممكن تعمل حفل اطلاق تعزم فيه كبار سكان المنطقة ليفتتحوا المحل ويدعو معهم معارفهم.. ممكن تعمل خصومات افتتاح .. وغيرها من افكار تناسب طبيعة فكرة المشروع وطبيعة العملاء المحتملين...