اليوتيوب بقي منصة كبيرة جداً لكتير من الشباب اللي بيقدموا أفكار كتير لفكرة أنهم عايزين يحققوا مشاهدات يكسبوا منها فلوس، عشان كدا مش كل الناس بتنجح في اليويتوب لانه كمنصة فيديو بيساعد فى انتشار المحتوى المميز وعشان تبقي صاحب محتوى مميز لازم تتعلم إزاي تكتب إسكريبت، والإسكريبت عامل رئيسي لنجاح أي حاجة بتتصور بشكل عام فيديو، فيلم، إعلان.. إلخ.
عشان تكتب إسكريبت بشكل إبداعي لازم تعرف الخطوات اللي هتمشي عليها وهي:
١. الفكرة أو القصة: الفكرة أو القصة هي اللي هيتبني عليها الإسكريبت كله بعد كدا، ويفضل انها تكون حاجة واحدة زي قضية معينة أو مشكلة ما أو رسالة عايز تقدمها للناس بشكل معين المهم تكون الفكرة موضوع واحد فى النهاية.
٢. المضمون: الخطوة دي متقسمة لعدة خطوات ثابتة لجميع أنواع الاسكربتات وهي:
- الاستهلال أو اللقطة الافتتاحية، وهنا بتبدأ تعرف الجمهور على الشخصيات الموجودة في الاسكريبت في كام دقيقة في البداية.
- الحدث، بيبدأ هنا يظهر بطل القصة أو القضية بأفكار ومعتقداته، ولازم هنا يبقي فى حالة من الترقب والتساؤل وهل فعلا البطل هيحقق أهدافه اللي بيسعي ليها لا لأ؟
- الإنعطاف الأول، هنا بيتظهر الحدث اللي بيقلب حياه البطل وطبعا هنا البطل لازم يفكر في حل ودا بيتعرض بنوع من القلق والحيرة للجمهور عشان يكمل متابعة.
- الإنعطاف الثاني، في النقطة دي لازم الكاتب يظهر البطل وهو بيحاول يستغل قدراته عشان يحسن من وضعه ويعالج الحدث اللي ظهر قلب حياته في الإنعطاف الأول.
- المشكلة أو العُقدة: في المرحلة دي بيحصل أحداث كتير وكبيرة للبطل منها اللي بيكون في صالحه ومنها اللي بيكون ضده وهنا دور الكاتب انه يحسسنا ان البطل مشتت ومش عارف يعمل اية يستسلم ولا يقاوم؟
- حل المشكلة، كل النهايات عارفين الخير بينتصر ع الشر لازم انت ككاتب تقدم نهاية تليق بعقل الجمهور مش تستهتر وتقلل منه.
دي الخطوات المتعارف عليها واللي بيطبقها كل للكتّاب الكبار، تقدر أنت كمان تطبقها على قصة من دماغك والممارسة المستمرة هي اللي هتخليك متمكن من اللي انت بتعمله.. ربنا يوفقكم جميعاً ❤️
387 مشاهدة
