عملت أكونت على خمسات وضفت الخدمة بتاعتي وبقالي شهور محدش اشتري مني حاجة اعمل اية؟
قبل الإجابة خليني أقول إن خمسات موقع من مواقع العمل الحر واللي بيعتمد على تقديم خدمات مصغرة بسعر ٥ دولار للخدمة، وهو منصة بتوصل العميل اللي محتاج الخدمة بالمستقبل اللي بيبيع الخدمة.
عشان تعرف إزاي تعمل حساب على موقع خمسات وتضيف الخدمة بتاعتك شوف الهايلايت بعنوان " خمسات & مستقل"
اي منتج جديد لازم الناس تعرفه الاول قبل ميروحوا يشتروا، بالإضافة الي انهم لازم يتأكدوا انه هيحل مشكلة معينة أو هيضيف لحياتهم حاجة جديدة، ودا بالظبط اللي بيحصل مع الخدمة بتاعتك لازم العميل يعرف انها موجودة ويتأكد من مدي جودتها عشان يقدر يشتريها.
طب نعرف العميل إزاي اننا موجودين على خمسات ؟ نسوق لنفسنا عن طريق الاشتراك في مجتمع خمسات اللي هو حاجة شبه المنتدى كدا ولية كذا قسم هشرحلكوا كل واحد بالتفصيل👇🏻
١. قسم نماذج أعمال قمت بتنفيذها.
القسم دا مخصص للناس اللي باعت الخدمة واستأذن العميل اللي اشتري انها تنشر جزء من الخدمة للتأكيد من جودتها والتسويق لها، طب انا لسة مبعتش حاجة هعمل اية فى القسم دا؟ هروح اشوف النماذج بتاعة المنافسين واعلق عليها وبالتالي لما العملاء يدخلوا ويشوفوا تعليقاتك هيكون عندهم الفضول انهم يشوفوا حسابك وبالتالي يشوفوا خدمتك ويشتروا بإذن الله.
٢. قسم الطلبات الخدمات الغير موجودة.
القسم دا من أهم أقسام مجتمع خمسات لأنك ممكن تحقق منه أرباح كتير جدا من غير متكون عارض للخدمة اللي بتقدمها ع الموقع أصلا، القسم دا بيدخلوا العملاء عشان يدورا ع حد يقدملهم خدمات مش موجودة في تصنيفات خمسات، وبالتالي أنت عندك فرصة تكتشف حاجات جديدة أنت تقدر تعملها وتقدمها بمقابل مادي، وكل لما قدمت عرض كويس كل لما زادت فرصتك في الحصول ع الربح وطبعا دا جزء مهم من التسويق لخدمتك ع خمسات.
٣. قسم تجارب وقصص المستخدمين.
القسم دا جميل وممتع جدا لأن بيسمح ليك ولغيرك من المستقلين نشر تجارب النجاح والفشل اللي حصلت معاكم ع خمسات ومن خلال نشرك أو التعليق ع قصص غيرك فأنت بتسوق لخدمتك وبتاخد خبرة من الناس اللي شغاله معاك ف نفس المجال.
٤. قسم أمور عامة حول خمسات.
القسم دا اتعمل مخصوص عشان الناس اللي عندها أسئلة واستفسارات أو مشاكل في خمسات تقدروا تكتبوها هنا وفي ناس مخصصة للرد عليكوا بأسرع وقت.
تلميح بسبط: مممكن تسوق لخدمات على خمسات بطرق أخري خارج خمسات زي نشر خدماتك على جروبات الفيسبوك الخاصة بالعمل الحر مع شرح مميزات خدمتك، ممكن كمان عن طريق لينكد إن..وغيرها من الوسائل الموجودة وبنستخدمها ع طول فكروا أنتوا بس وهتلاقوا مليون طريقة 👌🏻
39 مشاهدة
