لما الشخص بيكون عايش لوحده بتبقي مسؤوليته معروفة ومحددة، لكن لما بيندمج في الحياة مع شخص آخر مسؤولياته وأولوياته بتختلف وتتغير مع مرور الوقت وخاصة البنت، لما بتتجوز وتخلف حياتها بتتحول 180 درجة في كل شئ ولكن بقوتها وعزيمتها تقدر تحقق نجاحات في كل المجالات في البيت كزوجة وأم وفي الشغل كفريلانسر ناجحة ومميزة في مجالها أياً كان بس إزاي تطبق دا فعلاً على أرض الواقع ؟
1. حددي أولوياتك، كلنا مختلفين وبالتالي أولويتنا مختلفة لازم تقعدي مع نفسك وتحددي أولوياتك بكل صدق يعني أنا مثلاً أولوياتي زوجي وبنتي ولأن هما ليهم الأولوية في حياتي سبت شغلانة كنت بحلم وبسعي ليها لفترة طويلة ولكن لما زوجي وبنتي أحتاجوني أكتر من الأول فقررت اتنازل عشانهم.
2. نظمي وقتك، من أكتر الحاجات اللي هتفرق في حياة أي حد مش بس الأمهات هو تنظيم الوقت وعمل to do list يومية بكل اللي لازم تعمليه أنتِ وأطفالك، من كتر منا بحب تنظيم يومي مبقتش أحتاج الورقة والقلم عشان أكتب قائمة المهام بقيت أعملها في دماغي بليل وأصحى أطبق كله تاني يوم.
3. اختاري مهنتك، لو أنتِ لسة مشتغلتش ونفسك تشتغلى من البيت دي فرصتك تدوري على شغفك كتابة، ترجمة، كروشية، رسم، شغل الديكور وتتعلمي وتطبقي وتبني البيزنس بتاعك بنفسك.
4. طوري مهاراتك، العالم مبيقفش عن التطور لازم انتِ كمان تستثمرى في نفسك وتطوري مهارات شغلك بإستمرار حتى لو حققت نجاحات فيه يعني استثمارك في نفسك اهم شئ لإستمرار نجاحك.
5. تصالحي مع نفسك، دي أهم نصيحة أقدمها لك أنهاردة تصالحي مع نفسك لأكبر درجة ممكنة متلوميش نفسك على تقصيرك تجاه أي شئ في حياتك لأنك إنسانة محتاجة تشعر ببعض الراحة من كل حاجة حتي البيت والأطفال والشغل.
ياريت اللي حقق نجاح يكتبلنا أهم النصايح اللي طبقها وطلع منها بنتيجة إيجابية عشان الكل يستفيد♥️
26 مشاهدة
